Þróunarsaga Dead Island 2 er lyginni líkust

Leikurinn var fyrst kynntur árið 2014 en síðan þá hafa mörg leikjafyrirtæki komið að þróun hans og útkomu frestað ítrekað.

Dead Island 2 er framhald af seríu sem var upp á sitt besta fyrir áratug síðan, Dead Island sem kom út árið 2011 og Dead Island: Riptide sem kom út 2013. Eftir að framhaldið var kynnt hafa mörg leikjastúdíó komið að hönnun leiksins og gefist upp á verkefninu. En nú er víst stutt í útkomu leiksins, Deep Silver hafa lofað útgáfu 21. apríl nk.

Þarna er á ferðinni fyrstu persónu morð-orgía sem gerist í Los Angeles. Borgin er full af uppvakningum og það er undir þér komið að salla niður, saga í sundur og aflima kvikindin svo sómi sé að.

Nokkrir punktar um þróun leiksins:

2012: Techland var upphaflega með verkefnið á sínum snærum en ákváðu svo að snúa sér alfarið að hönnun Dying Light með Warner Bros. Þýska stúdíóið Yager Development kynntu sínar hugmyndir um leikinn fyrir Deep Silver og fengu samning. Yager var tekið til gjaldþrotaskipta fáum árum síðar.
2014: Dead Island 2 var sýndur á E3 kynningu Sony og áætluð útgáfa á fyrri helmingi ársins 2015. Sama ár var demo af leiknum sýnt á Gamescom ráðstefnunni.
2016: Í mars var tilkynnt að þróun leiksins væri komin í hendur Sumo Digital.
2019: Aftur skipt um þróunaraðila og nú er það dótturfélag Deep Silver, Dambuster Studios, sem fær það verkefni að klára leikinn.
2022: Leikurinn sýndur á Gamescom og sagt að hann komi út í febrúar 2023. Í nóvember var tilkynnt að útgáfan frestaðist um nokkrar vikur eða til apríl 2023.