Útgáfu Subnautica 2 frestað, hausar fjúka og ásakanir ganga á víxl

Kóreski útgefandinn Krafton sem keypti Unknown Worlds, þróunaraðila Subnautica seríunnar árið 2021, ákvað að reka forstjóra og tvo stofnendur UW fyrr í vikunni. Stendur deilan um stöðu leiksins sem átti að koma út á þessu ári og 250 milljón dollara greiðslu sem Krafton hafði skuldbundið sig til að greiða stjórnendum fyrir árangur Subnautica seríunnar.

Krafton vill meina að Subnautica 2 sé ekki tilbúinn til útgáfu vegna lélegrar frammistöðu forsvarsmanna Unknown Worlds, stofnendanna Charlie Cleveland og Max McGuire og forstjórans Ted Gill. Þremenningarnir hafna þessum ásökunum og hafa höfðað mál á hendur útgefandanum vegna samningsbrots.

Fyrsti leikurinn í Subnautica seríunni kom út árið 2018. Um er að ræða neðansjávar survival ævintýri sem hlaut góða dóma og seldist afar vel. Framhaldsleikurinn Subnautica: Below Zero kom út árið 2021 og skömmu síðar keypti Krafton fyrirtækið með húð og hári.

Krafton er Suður-Kóreskur útgefandi sem er einna helst þekktur fyrir að vera móðurfélag PUBG Studios og Tango Gameworks.

Útgáfu Subnautica 2 hefur nú verið frestað fram á næsta ár a.m.k. aðdáendum seríunnar til mikillar skapraunar.

Nánar:

Krafton tilkynnir nýjan forstjóra fyrir Unknown Worlds: https://www.krafton.com/en/news/press/krafton-announces-gaming-industry-veteran-steve-papoutsis-as-new-ceo-of-unknown-worlds

Charlie Cleveland um væntanlega málsókn gegn Krafton: https://www.reddit.com/r/subnautica/comments/1lwsxco/lawsuit_a_community_update_from_charlie

About The Author

erkiengill

Erkiengill er miðaldra karlmaður sem hefur áhuga á tölvuleikjum. Fyrsta leikjavélin sem hann eignaðist var Atari 800XL og var með 64Kb minni. PSN: erkiengill

See author's posts